شعب ملوش كتالوج

احنا بالصلاة على النبى كده .. صيادين سمك

صيادين من اللى قلبك يحبهم ، عندنا بحر ابيض ، بحر احمر ، النيل العظيم ، بحيرات ميتها مالحه ، وكمان بحيرات ميتها حلوه ، يعنى الاشيه معدن وزى الفل ، والصيادين فى كل الدنيا بيحسدونا على العز اللى احنا فيه والمياه محوطانا من كل حته.

بس بصراحه بينى وبينك ، احنا غاويين مشاكل ووجع قلب ، مره نطلع بمراكبنا نصطاد على حدود ليبيا وممكن نزودها شويه ونوصل لحدود تونس ، آه .. ما هو الرزق يحب الخفيه ، ومره نطلع بمراكبنا على حدود السودان ، نبعد شويه ، نقرب شويه ، ما تفرقش معانا ، تقوللى بس ده غلط وممكن تتمسكوا او يتقبض عليكم ، هقولك وماله ، احنا عارفين حكومتنا بتخاف من خيالها ، يوم ما يتقبض علينا ، نتصل باهلنا فى مصر يجيبوا الاذاعه والتلفزيون وكل بتوع الاعلام يصوروا اهالينا وهمه بيصرخوا ويلطموا ويعيطوا ، ويقولوا حكومه فاشله بايعه ناسها ، والخارجيه فاشله ومش عارفه ترجع ولاد بلدها المقبوض عليهم فى بلاد الغربه ، ونوصى ستاتنا يلموا نسوان الحى والعيال الصغيره ويبداوا موشح الفقر وحكاوى عن الولاد اللى مش راضيين يآكلوا ويشربوا من يوم ما عرفوا ان ابوهم اتقبض عليه والبت سعديه بتقوم فى عز الليالى تصرخ وتشد فى شعرها وتلطم وهى تتبول لا اراديا وتقول ابويا ضربوه بالرصاص وقتلوه.

لا تمر اربعه وعشرين ساعه على إذاعة هذه الملحمه الدراميه ، إلا وتعلن الحكومه انها ارسلت مندوبها يتدخل فى الضغط والافراج عننا ، وكمان المحافظ ووزيرة الشئون يصرفوا فورا لاهالينا مبالغ ماليه ، ومش بعيد لو حد محتاج حتة ارض يعمل عليها مشروع ، او واحده من اهالينا عاوزه تتعالج بالخارج على نفقة الدوله ، او طفل عاوز يقبل فى مدرسه وعمره لا يسمح .. كل هذا يتحقق وفورا.

عرفت ليه بقى احنا ما بنخافش ونصطاد من المكان اللى يعجبنا ، ده الواد حميدو آخر مره اتقبض عليه ، وصل لنا وهوه بيرقص ، ولما الناس سالوه انت فرحان ليه يا حميدو ، قالهم لما اتقبض على فى السودان ، عطونى خمستلاف جنيه ورجعونى راكب طياره ، تصدق بالله ، اول مره فى حياتى اركب طياره ، بادعى ربنا ان المعلم الكبير بتاعنا يقولنا الطلعه الجايه على ايطاليا ، نصطاد من هناك ، اصل بصراحه نفسى اركب طياره الخطوط الجويه الايطاليه بيقولوا المضيفات زى العسل والخدمه ميه ميه.

انا بالصلاة على النبى كده .. فلاح

فلاح مثقف ، اى نعم راسب ثانويه عامه ، بس مخى ده يوزن بلد بحالها ، القريه كلها عرفانى وخيرى عليهم جميعا ، فراج السلمونى جبتله تصريح يبنى بيت على جذء من ارضه الزراعيه ، كانت جايباله ميت الف دلوقتى طالب فيها نص مليون ، الفلاحين اللى كانوا واخدين قروض من بنك التسليف ، قلت لهم ما يسددوش ، فى الاول كانوا خايفين من الحكومه والسجن ، قلتلهم برقبتى لو حد فيكم جراله حاجه ، كل اللى عليكم تتجمعوا بكره بعد صلاة الضهر امام باب البنك ، اتفقت مع واحد من بتوع الاعلام اللى بيحب الفرقعه ، جانى فى الميعاد بالظبط ومعاه الكاميرات وهات يا تصوير واسئله ، الناس بتوعنا قاموا بالواجب اللى بيصرخ واللى يزعق وكلهم بيقولوا ممعناش نسدد والدوله لازم تساعدنا وتشطب مديونياتنا ، وولادهم ونسوانهم كملوا الصوره المطلوبه ، هيصه وزمبليطه والكل يعيط ويقول هجيب منين ، مدير البنك والمحافظ ومدير الامن وصلوا بسرعه والنتيجه زى ما رسمتها بالظبط ، المحافظ بثقه اخد القرار المطلوب ، المحافظه هتسدد عنكم ، متزعلوش وروحوا دلوقتى واحنا هنتصرف مع البنك ، كل واحد رجع بيته فى هدوء وانا كل اللى طلعلى من الفكره دى يا دوب عشره فى الميه من مديونية كل منهم ، بس بينى وبينك كان مبلغ محترم.

طبعا لانى فلاح مثقف ومتابع للتلفزيون والجرايد ، جبت مصوراتى يصور بيت ام الخير وسعديه وفرحانه ، صور كلها بؤس وشقاء ، مع شوية فوتوشوب وطلعت على جمعيه خيريه بالقاهره ، ما فاتش شهر إلا وكانت كل واحده منهم بتتصور مع الجاموسه العشر اللى استلمتها كمعونه للفقراء ، ما فاتش اسبوع إلا وسلموهالى بنفس راضيه نظير ميتين جنيه يستلموها منى اول كل شهر ، بفضل الله الجاموسه الواحده بتجيبلى صافى الف جنيه ، وآهى ماشيه.

اما بقى الاستاذ فتحى بتاع الجمعيه الزراعيه ، فانا مريحه وعطيله حقه وزياده ، كل ما عليه يسلمنى الكيماوى والتقاوى بسعر اعلى من التسعيره وانا ارجع ابيعه للفلاحين بسعر مضاعف فى مقابل تقسيط المبلغ ، بصراحه حقى مضمون بالكمبيالات ووصولات الامانه.

ده غير انى باساهم فى النهضه التعليميه لاهل قريتى ، اتفق مع مدرسين يدوا دروس خصوصيه فى المساجد ، وبطلعلى من السبوبه دى مبلغ محترم ، وفى الصيف استاجر خمس ميكروباصات يطلعوا رحله لاسكندريه يوم واحد ، كل اسبوع رحله ، منها ترفيه عن اهل القريه وازود ارباح اصحاب الميكروباصات اللى غالبا بيكونوا امناء شرطه ، بافيد واستفيد ، واللى باكسبه من السوق السودا بتاعه عجز انابيب البوتاجاز او السولار والبنزين ، ده باوزعه لوجه الله على الفقرا والمحتاجين من اهل قريتى ، وطبعا كل فروض صلاتى فى المسجد ، بس اللى مضايقنى ان اشباه المثقفين فى القريه فاكرنى مستغل ووصولى ، وبيحاربونى فى الترشح لمجلس الامه رغم انى باستمرار ضامن لى كرسى فى البرلمان  .. بالذمه دى آخرتها من المثقفين؟

انا بالصلاة على النبى كده .. موظف حكومى

اول ما استلمت وظيفتى، كنت موظف مندهش ، اندهشت عندما عرفت ان المسئول الخانع للاعلى منه ومتجبر على الاقل منه هو الموظف المثالى ، ومن يقدم خدمات خارج العمل هوه الموظف اللى ما يتحاسبش ودائما اسمه ضمن كشوف العلاوات والترقيات والمكافآت ، مش مهم شهاده وخبره وكفاءه إلا فيما ندر ، خلال فترة تطورى الوظيفى تحولت من موظف مندهش الى رئيس قسم مطبلاتى ثم لمدير اداره مغنواتى  ثم رئيس قطاع موافقاتى والآن رئيس مجلس اداره مهلباتى ، الشركه شركتى والموظفين بتوعى ، وكل اللجان الاقى نفسى رئيسها ، لجنة الرحلات تحجز لى بصفه مستمره ارقى شاليه من شاليهات الشركه طوال الصيف مجانا ،  جمعية الاسكان وصندوق الزماله مسخرين لخدمتى ،  قطاع الاداريه يخترع بدلات ومكافآت ومقابل حضور جلسات لم احضرها ، سفرياتى للعلاج بالخارج الاقيها اتسجلت مهام لاعمال الشركه بمكافآت وبدلات ضخمه ، سيارة الشركه بسواقها اربعه وعشرين ساعه تحت تصرفى وتصرف اسرتى ، حتى سيارة المدام تتفول بنزين يوماتى ، كل ده فى مقابل انى اوافق على صرف اتنين كيلو لحمه لكل موظف فى العيد الكبير او صرف منحة نصف شهر فى رمضان او العيد الصغير ومثله عند دخول المدارس ، او حتى علبة حلاوه المولد ، ده طبعا غير بعض الطلبات البسيطه ، والنبى يا باشا فلان الفلانى عاوزين نرقيه ، ده راجل كبير وطالع معاش كمان سنتين ، وبتوع الماليه عاوزين إضافى ووجبة غداء عشان بيسهروا لتقفيل الميزانيه ، وبلاش نودى عم السيد فى داهيه عشان اختلس شوية كهنه بمتين الف ، الراجل حلف لنا باغلظ الايمانات انه مش هيكررها تانى ، وانت كريم ومتحبش الاذيه ، ربنا يباركلك فى صحتك واولادك ، والموظفين عاوزين يجهزوا المخزن يعملوه حضانة اطفال لان ولادهم متمرمطين فى الحضانات الخاصه ، ومطلوب موافقتك على تجديد باب الشركه اللى اتكلف خمسين الف بس ، وزودنا مكيفات لمكاتب رؤساء القطاعات ، والموظفين طمعانين فى كرمك وعاوزين شهر منحه لغلو الاسعار ، ورئيس القطاع المالى عاوز موافقتك الشفهيه على عزومه يوميه فى افخم مطعم لبتوع الجهاز المركزى عشان يقللوا ملاحظاتهم فى التقريرالسنوى ، وبتوع الضرايب عاوزين شوية هدايا ومش عارفين نعمل معاهم ايه ، بنفكر نعزمهم همه كمان مع بتوع الجهاز او نجيب لهم هدايا متواضعه فى حدود خمستلاف لكل واحد فيهم ، ما تقلقش يا باشا احنا هنستفها بحيث ما تجبش ملاحظة فى التقرير السنوى لجهاز المحاسبات ، احنا يا باشا مش عاوزينك تقلق من الحاجات البسيطه دى ، احنا عاملين حسابنا ومظبطين المسائل مع الشركه القابضه.

بعد سنه من وظيفتى الجديده ، رجعت لحالة الاندهاش واصبحت رئيس مجلس اداره مندهش.   

انا بالصلاة على النبى كده ... رجل اعمال جديد

انا رجل اعمال جدع وشهم واعجبك ، بس مش زى رجال الاعمال اللى بيطلعوا فى التلفزيون ، انا اجدع منهم ميت مره ، ونشاطى متعدد وقهوة السلام بالمنشيه هو مكتبى الدائم ، اكيد بتشوف عربات كارو محمله بخضار وفاكهه واقفه او دايره بالشوارع ، دول يا باشا تابعين لى ، الصبح الواد قبارى يجيب البضاعه من وكاله الخضار ويوزعها عليهم بالتريسيكل بتاعى ، وآخر النهار يلم الغله ويقابلنى فى مكتبى ، فاكر السيول اللى حصلت من سنتين فى العامريه ، فورا بعت شوية من صبيانى يندسوا وسط المتضررين ، طلعوا من الحكايه دى بشوية بطاطين واكل وشرب ، ده غير التعويض المادى اللى اتوزع عليهم ، الواد هلال واد اصيل ، الشقه اللى اتوزعت عليه فى المساكن الشعبيه جابلى العقد وقالى تحت امرك يا باشا ، بس انا راجل حقانى ، قلتلهم النص بالنص ، عشان كده ربنا باستمرار كارمنى ، ليله خروجى من السجن الواد فراج صمم انى ابيت عنده فى الدويقه ، كان مزنزق فى قرشين يبدأ بيهم حياته ، قولتله وماله خير ربنا كتير ، عمللى عقد بيع وشرا لشقته وسلمته خمستلاف  ، ما فاتش سنه إلا وحصلت كارثه الصخرة ، فوريره وصلت مصر اشوف شقتى ، عشان انا ابن حلال ، طلعلى بدلا منها شقه محترمه فى 6 اكتوبر ، والهلال الاحمر فرشها وحط فيها الادوات المنزليه كمان ، ده غير قرشين حلوين من بنك ناصر ، الشقه دى بقى ناوى ابيعها لانى مش غاوى انزل مصر وكفايه شغلى باسكندريه ، اكيد هتجيبلى نص ارنب ، ربنا كريم ، ولان قلبى طيب وضعيف قدام الناس الغلابه ، تلاقينى باقابل عضو مجلس شعب او عضو مجلس محلى ، اطلب منه كشك سجاير او نصبة شاى وغالبا آخد اللى انا عاوزه ، ولانى مشغول اوقف فيها واحد من صبيانى ، مش باقولك انا باساهم فى تشغيل الشباب ،  وياويل المسئول اللى يزرجن ويرفض لى طلب ، جوابات وشكاوى للمحافظ وللتلفزيون ولرئيس الحكومه ، وآخرتها برضه آخد اللى اطلبه ، ده غير سبوبه كده على قد الحال ، اللى عاوز يخلص اوراق وتصاريح البناء المخالف للشروط ، كلهم عارفين سكتى ، يدفعوا المعلوم اجيب لهم الموافقات اللازمه ، والحكايه بسيطه نص لى ونص للى بيعتمد ، وآهى ماشيه ، حتى ممكن اساعد واجيب له كحول يشيل الليله كلها لو حصلت مشكله مع الحكومه ، وكله مضروب ، والضارب والمضروب صحاب وحبايب ، ما تستغربش على تعدد انشطتى ، يعنى ممكن تلاقينى راشق فى اى دعايه لاى ناخب نازل انتخابات مجلس شعب ، مجلس ادارة نادى ، مجلس محلى ، الم صبيانى ونقوم بالواجب نظير مبلغ متفق عليه ، وبالمناسبه انا عضو ناشط فى رابطه مشجعى نادى الــ..  ، واى لمه فى اى حاجه هتلاقينى فى الصفوف الاولى ، هتقوللى شكلك ما يجيبش كل ده ، هقولك ميغركش منظرى ، ده كل كبارات اسكندريه عارفنى وعارفين انا جامد قد ايه ، اومال يا باشا ، لو سالتنى ايه حكمتك فى الحياه ، هقولك بسيطه قوى ،  "اللى تكسب به العب به" وكمان "من امن العقاب ، اساء الادب" ، بس وحياة ابوك متنشرش اسمى لانى بخاف من الحسد.

انا بالصلاة على النبى كده .. إعلامى

انا إعلامى وصحفى ومذيع وممكن لو طلبونى فى فيلم ما اتاخرش ، اى وسيله تجيبلى فلوس انا معاها ، مع النظام السابق امورى زى الفل ، مع النظام الاسبق قضيت احلى مصلحه ، مع النظام الحالى صوتى واضح ومشهور ، من بدرى قوى عرفت سكتى ، كنت اهاجم وزير الاسكان ، يسكتنى بفيلا فى مارينا ، اهاجم وزير التعليم ، ابن اختى يقبلوه  فى مدرسه وسنه ما تسمحش ، اهاجم وزير السياحه ، يتحجز لى اسبوع فى افخم فندق فى شرم الشيخ انا واسرتى ، طبعا عندى اسطوانه حافظها صم ، فانا من اكبر المؤيدين للقضيه الفلسطينيه والوحده العربيه ، شوية مسح جوخ لحبايبنا بتوع الخليج ، تجينى دعوه لالقاء محاضره ارجع منها شايل ومحمل ، شويه اهاجم التوجه الاسلامى وشويه الناصرى وشويه الليبرالى وشويه الاشتراكى حسب الاحوال ، قالوا عنى اقوى محلل سياسى واشجع اعلامى وخبير فى تاريخ الاسلاميين وفلته زمانى فى العلاقات العربيه ، ده طبعا بيحتاج منى شوية بحث عن كلمات فخيمه مثل التنميه المستدامه او الحريه والديمقراطيه وحقوق الانسان والفتنه الطائفيه والقضايا المعاصره وثورة الجياع والحداثه والطفرات الاقتصاديه ، وصندوق النقد الدولى ، التكتل اللوجستى والقرارات الامميه ، والكيانات النشطه ،  كل اللى باعمله انى باحط  اى كلمه من دول فى جمله مفيده او غير مفيده ، شويه ثقه ونفخه كدابه وبدله جديده لايقه مع الكرافت وابتسامه ساخره مرسومه بحساب ، يبقى كل كلمه باقولها يفتكروها حكمه ، طبعا لو وسط الكلام اتلجلج كأن الكلمه بالانجليزى على لسانى ومش لاقيلها مقابل بالعربى ، واكتر حاجه مصيتانى ، اعمال الخير ، استضيف ناس غلابه واقعد اتاجر بيهم عند اصحاب القلوب الرحيمه ، مره والتانيه ، كل الغلابه اللى يستاهلوا واللى ما يستاهلوش يبقى يوم سعدهم لما اوافق على استضافتهم ، افتكروا ان انا باديهم من جيبى ومن حر مالى ، طبعا ما بانصصش معاهم انما بيدعولى من قلبهم وده مقبول ، ويوم ما احس ان توجه الدوله ضد واحد من الحيتان ، اعزمه عندى فى البرنامج ، لو فتح مخه وورد المعلوم قبل الحلقه ، اجيبله اخيب ضيف يشترك معاه فى الحوار وممكن اديله ورقه بالاسئله اللى هسالها له ، انما لو طلع غبى ومفهمش صح ، هيكون ضيفه اشرس واحد وتكون اسالتى من النوع اللى يودى فى داهيه ، يوم ما صدر القانون الجديد اللى بيمنع حبس الاعلاميين كان يوم سعدى وفرحتى وقوى قلبى على السب والتهور على ايتها مسئول بالدوله ، لو لقيت مشكله بسيطه فى وزارة ، اهاجم الوزير واتطاول عليه واقوله انت فاشل ولازم تسيب مكانك ، واناشد رئيس الدوله انه يعمل تغيير وزارى ، ما يفرقش معايا وزير صحه وزير تعليم وزير اسكان وزير بيئه ، انا بالقانون ده بقيت اقوى منهم ، مؤكد المحافظين ورؤساء الهيئات والاتحادات والمستثمرين ما يخدوش فى ايدى غلوه ، ولإظهار قوتى للمشاهد ممكن اهاجم دوله ورئيسها ، عارف سكتى كويس ، اعزم واحد من السبابين المعروفين فى قطر مصر واديله الحريه فى بدء وصلة الردح والسباب ، واتدخل بطريقه ملتويه ظاهرها انى استنكر وفى الحقيقه انا بانفخ فى الكير ، كل ده وانا مطمن ان القانون والنقابه ساندنى سواء كنت على حق او على باطل ، بالذمه حد يلاقى الكحل وما يتكحلش ، اهو انا واللى زيى بنحب بلدنا وفى نيتنا ان احنا نكحلها كمان ، "من الامثال المصريه : جه يكحلها .. عماها " مننا لله.  

انا بالصلاة على النبى كده واحد من الشله

الاول يا باشا هقولك يعنى ايه شله يمكن تكون مش واخد بالك ، شويه بنى آدمين متجمعين مع بعض ، عاملين نقابه حزب رابطه جمعيه منتدى التراس ، المهم ان احنا نكون سوا سوا وهدفنا واحد وهو ان احنا نآخد اللى من حقنا واللى مش من حقنا كمان ، نتخانق مع بعض على مين فينا الريس ، فى النهايه صاحب اعلى واجش صوت واكثرنا عناد وتربسه هوه اللى هيكسب ، ولو الاخ ده معاه قرشين يرميهم بذره هيحصدها فى المستقبل ، ده هيساعده كتير على اقتناص منصب الرياسه ، احنا بالصلاة على النبى لو النادى اللى بنشجعه عاوز ارض يبنى عليها مقر جديد نروح نقف قدام المحافظه ، لو النادى اللى بنشجعه فاشل وهينزل درجه تانيه ، نلم بعض ونقف قدام اتحاد الكوره ، طبعا هتافات وتكسير وضرب طوب ، يطلع لنا قرار فورا ، الارض آهيه جاهزه ، والدورى الممتاز السنه الجايه من خمسين فريق وفريقكم معاهم ، ولا يهمكم بس روحوا ومتزعلوش نفسكم ، لو محامى عمل مشكله مع قاضى او مامور قسم شرطه ، نقابتنا مش هتسال هوه المحامى صح ولا غلط ، هنعمل اضراب عن العمل ونجيب شلل للبلد كلها ، ونطلعه من المشكله زى ام السعد ما بتطلع الشعره من العجين ، لو عاوزين ميزانية الصحه تزيد هنلم الاطباء من كل مصر ونقف على سلالم نقابة الصحفيين ، يجيلنا مسئول ، روحوا انتم دلوقتى وبكره الميزانية هتتضاعف وبدلاتكم هنعيد النظر فيها ، ويوم قطاع الغزل ما طالب شهر مكافأة ورفضوا ، قالوا القطاع ده بيحقق خسائر وانتم بتآخدوا تمنتاشر شهر مكافآت فى السنه ، منين هنجيب لكم ، هيه وقفه احتجاجيه واحده ، عطلنا العمل بالمصانع ، وافقوا على الصرف فورا، بس احنا ما سكتناش طالبنا بعزل رئيس مجلس الاداره ، وبرضه دى وافقوا عليها ، نقابة المهندسين والطيارين والصحفيين والنقل والمواصلات و و و ، كلنا زى بعض ، لو حقنا احنا واخدينه انما لو عاوزين اكتر مما نستحق هنآخده لان احنا فى عصر الطبطبه ، والعبيط هو اللى يلاقى دلع وما يدلعش ، انما المستغرب ان شلة رجال الاعمال وبتوع الغرف التجاريه داخلين معانا فى موضوع البلطجه ، دول ناس مش ناقصين ، بس مبدئهم ان البحر يحب الزياده ، دايما بيضغطوا على البلد عشان يآخدوا اللى يقدروا يستولوا عليه سواء ارض قرض احتكار اسعار كانهم عطشانين وبيشربوا ميه مالحه ،  هيفضلوا طول عمرهم عطشانين ، وعلى الطرف الآخر لهذه الشله نلاقى شلة مربى الدواجن وتصديهم للحكومه فى استيراد الدواجن لتحافظ على سعر معقول ، وعدوا انهم لن يرفعوا اسعار الدواجن ، بس الدوله توقف استيرادها ، لم يمضى اسبوع الا وتضاعفت الاسعار وطبعا جنوا من وراء ذلك مليارات ، ولم تجرأ الحكومه على فرمله ارتفاع الاسعار ، ما همه دول شلة مربى الدواجن الجامدين قوى.

اجمل الشلل اللى تلاقيها فى مصر هى شلة الرياضه ، كلهم ايد واحده ، لا يختلفوا إلا عندما تتصادم المصالح ، الكل مستفيد ويهلب ويكسب ، مدرب يآخد مرتب شهرى قد مرتب رئيس الوزراء عشر مرات ، راتب لاعب نص لبه فى موسم واحد يعادل راتب مائة طبيب فى سنه ، اللى يعتزل يتعمله حفله مكافاه نهاية خدمه يطلعله منها بقرشين حلوين ، بعدها باسبوع تلاقيه محلل رياضى فى محطه فضائيه او مدرب مبتدئ وكله بالشيئ الفلانى ، طبعا كل الفلوس تصرفها الحكومه لهؤلاء المحظوظين ، ويا سلام لو واحد اخد بطوله ، يوووه يومها لو طلب لبن العصفور هيجيله فورا على طبق من ذهب ، تشعر انه ماسك لمصر على ذله ، اللى يضرب موظف حكومى او رجل امن ، يقولوا سماح ده بطل ، واللى يستولى على قطعة ارض مش من حقه ، ده ميقصدش السرقه يللا بسرعه قننوا موقفه ، واللى عاوز شقه راقيه ، اتفضل ، ملايين ومليارات تنفق على المحاسيب والمصلحجيه واللى عارفين من اين تاكل الكتف.

شفت بقى فايدة الشله ، انصحك اوعى تفوت فرصه وانضم فورا لاى شله اهو كله مكسب وللاسف مكسب من لحم مصر الحى ، بس انصحك لا تنضم للشله الوحيده اللى عملت إضراب ومجبش نتيجه ، بتسالنى إضراب ايه ؟؟ اقولك "إضراب الشحاتين" لانه فيلم سينمائى لاحسان عبدالقدوس.

** للاسف الشديد .. احنا شعب ملوش كتالوج .. اظن واضح احنا ليه بنتقدم للخلف "